KATO PASAMBAHAN

GAYUANG BASAMBUIK
KATO BAJAWAB


CARO MAADOK NINIK MAMAK*

Bang Hendri : Tapi Sungguah pun Dody surang Ambo imbau, sifatnyo Sagolo Silang nan ba pangka karajo nan bajunjuang, sarato urang sumando, baa ruponyo dek ambo, ado niek jo makasuik, kok niek nak manyampaikan kok makasuik nak manyabuik, alah kajadi ambo baco, sekian bana dulu Dody

Dody : Alah Sampai Bang ?

Bang Hendri : Alah Dod.

Dody : Kato Abang Cako Sungguah pun Ambo surang Abang imbau, sifatnyo Sagolo Silang nan ba pangka karajo nan bajunjuang, sarato urang sumando, baa ruponyo dek Abang, ado niek jo makasuik, kok niek nak manyampaikan kok makasuik nak manyabuik, alah kajadi ambo baco, kan baitu kato abang cako? Bana diateh Illahi, gayuang disambuik capek, kato dijawab lakeh, buah perundiangan capek dipulangkan, Baa kini dek karano tasabuik di abang tadi, kami lai baduo, batigo mananti abang sabanta.

Bang Hendri : Dek Ambo Dod, Asakan karandak lai kabuliah, pintak lai kabalaku, insya allah ambo mananti.

Dody : Kok itu rundiangan abang, yo lah basuo bak pipatah abang kok mah, tambah rahim nak urang tiku, singgah basikek dado sulah, karandak buliah, pintak balun tantu, sabab nyawa kito dalam tangan allah. A nan lai dek ambo baru, pikie palito hati, nanang saribu akal, janji ka ganti padang kato – kato dek ambo.

Bang Hendri : Dek ambo, asa buek lai ka ba pakai, janjian lai ka batapek i, lamo jo lambek ambo nanti dod.

Dody : Dek ambo asa ayat dikanduang badan, asa nyawa dikanduang tubuah, janji jo abang ndak kalupo doh.

Bang Hendri : kalau lah baitu bana Di, Insya Allah Ambo mananti.



* PAIYOKAN KA DAKEK KAWAN *
Dody : Amra, Kini ndak ambo ulang bana do, buah kabanaran alek nan kito nan datang, mungkian bisiak alah kadangaran, surak samo kalampauan, aratinyo bana : Alek nan datang, mandatangkan buah parundiangan ka dakek ambo, baa jo kok de ambo, gayuang alun basambuik, kato baru nan bajawab, buah parundiangan alun bapulangkan, Baa kini satantangan gayuang ka manyambuik, kato nan ka manjawab, ambo sarahkan ka Amra.

 Amra : Alah Sampai dek abang ?

 Dody : Alah.

 Amra : Kini baitu Bang, kok itu rundiangan Abang jo badan diri ambo yo lah bana tu mah, sabab lah luruih lapeh banang, nan bungkuak makan siku - siku , sapanjang pasar biaso- e, nan babarih nan ka dipahek, nan balukih makan ukie, nan kato abang, bajabek daun bajumbai aka, jo abang tu tadi, tantu abang yang mamulangkan jo badan diri ambo, takuruang samo didalam, lapeh samo diluar, baa itu dek ambo nyo bang.

 Dody : Amra, nan kato ambo mamulangkan buah parundiangan ka bakeh alek nan datang, kok senteang mintak di bilai, kurang mintak di tukuak, kurang takana tolong ditimbua kan, ka baa tu amra ?

 Amra : Ka lopo lah Tuanku dek kaji nyo Bang?

 Dody : Surek ilang guru lah mati, kaji ndak kama di ulang lai doh.

 Amra : Tantu nyo dikambang Kitab tu dulu, Nak kami Simak kan.

 Dody : tuh Baa nyo Ambo Pulangkan Amra ?

 Amra : Insya Allah.


* DIPULANGKAN KA BANG HENDRI *

 Dody : Bang Hendri, Alah Lamo Bang Hendri mananti ?

 Bang Hendri : Alun baranjak duduak ka lai doh, baa ka lamo nyeh.

 Dody : Kini baitu Bang, Tempo di awa tadi abang mandatangkan buah parundiangan ka bakeh ambo, Baa jo kok dek ambo baru, bana di lalukan, janji di pintak satu rahaik, dek abang alah mananti, jo kok dek ambo alah bapaiyokan. Baa satantang paiyoan ambo nan tun? Kok golek alah sagolek, kok picak alah salayang, alah bulek air ka pambuluah, lah tajun air kapambatang, lah bulek kato jo mupakaik, satantangan gayuang ka manyambuik, kato ka manjawab, ka bakek abang, io lah alah tumpah kabadan diri ambo, ka baa di abang tuh ?

 Bang hendri : Dek ambo sumbarang ka pambai, indak baa dod, umpamo dody alah kajadih, pek kini lah dody bana, iyolah alah takayuah bidiak ka ilie, taracak kudo nan pandai, ta raih marawa ka bungkuak - e , Insya Allah Dod.

 Dody : Kini Baitu Bang, A bana buah parundiangan Abang ka bapulangkan, Kato abang tadi, Sungguah pun Ambo surang Abang imbau, sifatnyo Sagolo Silang nan ba pangka karajo nan bajunjuang, sarato urang sumando, baa ruponyo dek Abang tadi, ado niek jo makasuik, kok niek nak manyampaikan kok makasuik nak manyabuik, alah kajadi ambo baco, kan baitu kato abang tadi? Baa jo kok di ambo, kalaulah nak baranang ka tapian, barakik mo lah kahulu - e , pado hilang di kacak – kacak, pado mati diangan - angan elok mukasuik disampaikan.

 Bang Hendri : Tu Baa Dod, Iyo Ambo Baco ?

 Dody : Bacolah Bang ?

 Bang Hendri : Nan Kato Ambo ka mambaco buah parundiangan di hadapan Ninik Mamak, Tumbuah sacaro nan bak nang ko, Andek - e kan bataratik, ba munjilih, balelo ba kurenah, basambah bainjiangan tangan, aratinyo bana, di unjamkan lutuik nan duo, di takuak kan kapalo nan satu, disusun jari nan sapuluah, aratinyo bana : Sambah ta puhun ka nan patuik, kan baitu nak nyo, baa kini dek badan diri ambo, sawah dangka, pamatang kariang, urek kayu bajulingkangan, baa kini tantang sambah kito simpan baiak – baiak, dima maso kito pakai, kini rundiangan ajo nan ambo baco, ka baa dek Dody tuh ?

 Dody : Sampai Bang ?

 Bang Hendri : Sampai.

 Dody : Baa ruponyo dek abang Cako, ka mambaco buah parundiangan, tumbuah sacaro nan bak nang ko, andek - e bataratik ba munjilih, balelo ba kurenah, bairiang tangan kan, baitu kato abang cako?

* LANSUANG MAMPAIYOKAN KE BANG HENDRI *

 Dody : Kini baitu bang, Dek karano tasabuik dek abang tadi, kami ateh namo silang nan bapangka, karajo nan bajunjuang, sarato urang sumando, iyo baitu kami dahulu, mananti abang sabanta.

* DODY KE AMRA *

 Dody : Kini baitu amra, ndak ambo ulang bana buah kabanaran alek nan datang, kilek baliuang lah ka kaki, kilek camin lah ka muko, tapi tantang taratik sambah, itulah nan dimintak dek alek nan datang ka bakeh kito, baa ka kito nan ka elok amra?

 Amra : kalau baitu bang, sakali nangko jawab ajolah dek abang, jo ambo lah sasuai.

* DODY KE BANG HENDRI *

 Dody ; Kini Baitu Bang, Abang tadi mintak tantang ka pado taratik sambah, ta kalau undiangan ka di bukak, kan itu nan abang pintak ka rilaan ka dakek kami? tantang tu bang? Kalau lah babacoan alah samo jo bapakai tu mah, Insya Allah kami agiah karandak abang, bacolah, biar kami dangar kan.

* MANDATANGKAN SIRIAH *

 Palo Mudo : Mak Tapi Sungguahpun mamak Surang taimbau, sifat - e Ninik Mamak yang Saparadok, kini baitu mak, baa ruponyo dek anak mudo matah bacapek kaki baringan tangan, mauntiah siriah di di gagangnyo, mangganti pinang di tampuaknyo, mambali alat ditangah balai, lansuang disusun ka carano, caranonyo bana pun sakali, liek lah dek amak, siriah ambo yang talatak dalam carano, baliek, ba ambiak, ba makan sakali.

 Ninik Mamak : Kini baitu Palo Mudo, tapi sungguahpun ambo surang yang Palo Mudo sabuik, Sifatnyo kami banamo ateh Ninik Mamak, yang gadang basa batuah, cadiak pandaipun sakali, baa ruponyo dek palo mudo, siriah yang badatangkan ka bakek kami niniak mamak, katumpang rundiangan ka bakek ambo, baa nek - e palo mudo, tantang rundiangan palo mudo tu, misa gayuang lakeh disambuik, misa kato lakeh tajawab, siriah palo mudo capek taliek, baa kini dek badan diri ambo, dek karano rundiangan palo mudo, duduak surang basampik - sampik , duduak samo balapang - lapang , yo nak baiyo kami dahulu, mananti palo mjudo sabanta, ka baa tu dek palo mudo ?

 Palo Mudo : Dek Ambo Mak, asa mancaliak aie nan janiah, sayak nan landai, kato nan bana, Insya Allah Lamo Jo lambek ambo nanti.

 Ninik Mamak: Iyo itu bana ka kami cari palo mudo, baa baiyo kami dahulu, mananti palo mudo sabanta ka baa tu ?

 Palo Mudo : Insya Allah Mak, Baiyolah Ambo Mananti



* NINIAK MAMAK BAIYO KA BAKEK KAWAN - KAWAN TANTANG MANGAMBALIKAN RUNDIANGAN SIRIAH *

 Ninik Mamak : Bagindo, Tapi sungguahpun bagindo surang taimbau, Sifat - e sagalo nan duduak disitu, ndak ambo ulang bana buah kabanaran sapangka do, mungkin dek bagindo lah sairiang nan bak hari, lah tarang nan bak bulan, aratinyo bana, lah didatangkan siriah ka bakek kito, ateh namo niniak mamak, baa jo kok dek ambo, gayuang alun basambuik, kato baru nan bajawab, buah parundiangan alun bapulangkan, baa dek kito nan ka ancak, tantang kadatangan siriah kabekek kito, sekian dulu bagindo.

 Bagindo : Kok Undiangan tu mak, jo badan diri ambo, bakarek - karek tabu di katidiang, ba ragiah - ragiah ndak bacarai, jo kok ambo nan ka ancak mak, gayuangnyo basambuik, katonyo dijawab, srieh - e diliek, dimakan sakali, iyo baitu karancak di ambo, ka baa dek amak tu ?

 Ninik Mamak ; Kok itu undiang bagindo jo badan diri ambo, yo sairiang tungkek jo tuga, ndak batikai jalan saiyo ndak batuka sabuik, yo kok diambo nak ka ancak baitu pulo, akan tetapi nan kato kito inggok alah sacakam, tabang alah sapulun, satantangan gayuang ka manyambuik, kato ka manjawab, maliek siriah supangka pun sakali, yo alah ambo tumpahkan ka badan diri bagindo ka baa lai bagindo tu?

 Bagindo : Kok itu undiangan amak, yo lah basuo undiangan amak ko mah, ambo mamulangan tun, bak ibarat ayam lapeh sanjo, rumah tampak jalan ndak tantu, bakabuik sajo pamandangan, ndak tantu raso kadi tuju doh mak, baa kini pulangkanlah undiagan dek amak silang bapangka tu, jo badan diri ambo lah samo didalam, kok lapeh lah samo diluar, kok pikiran ndak baturuti, kok pituah ndak baunian doh lai mak, pulangan lah dek amak lai.

 Ninik Mamak : Tu baa yo ambo pulangan lai Bagindo ?

 Bagindo : Insya Allah.

 Ninik Mamak : Nan kato ambo ka mamulangan buah parundiangan, sialang sapangka, kok senteang mintak di bilai, lamah mintak di tau - e , Kurang mintak di tukuah, kurang takana dek ambo mintak ditimbuekan dek bagindo ndaknyo.

 Bagindo : Kalau baitu mak, maklum ajolah Singka pa kandangan mak, ndak naka di tolongi, inyo ka mambaliak surang ajo nyoh mak, pulangkanlah dek amak, dek ambo alah sasuai tu.

 Ninik Mamak : Kini baitu Bagindo, dahulu nan sarang gadubang, kini lah majadi sarang golok, sajak panguih lah patah ko bagindo, ndak mambaliak lai doh lai bagindo.

 Bagindo : Tantunyo dicuboan luh mak

 Ninik Mamak : Baa, iyo ambo pulangan Bagindo ?

 Bagindo : Insya Allah
* SIRIAH DI PULANGKAN KA BAKEK SUPANGKA *

 Ninik Mamak : Tempo di awa tadi kapalo mudo mandatangkan siriah kabakek kami niniak mamak, ka tumpah undianagan ka bakek ambo, ba a jo kok dek ambo, misa gayuang balum basambuik, kato baru nan bajawab, Siriah palo mudo alun baliek, a nyo nan lai dek baru, bana di lalukan, janji di pintak satu rahaik, dek palo mudo alah mananti, dek ambo alah pulo ba paiyo, baa satantang paiyoan ambo nan tun, yo basuo undang – undang palo mudo, ba lega kabau dikandang, suruik kanantu ka bakero, ba lega kato di ulang, tantu suruik ka nan tuo, dek nantuo ta tumpah kapado diri ambo, ambo yang ka mamulangan undiangan palo mudo tu, ka baa dek palo mudo ?

 Palo Mudo : Dek ambo mak, Sumbarang ka pambai jadih nyo mak, indak bana amak, umpamo amak lah kajadih, pek kini lah amak bana, ambo raso, yo lah di ujuang barih bana padi tarabitnyo mak, insya allah.
 Ninik Mamak : Iyo ka Baliek bana siriah palo mudo tuh, palo mudo?

 Palo Mudo : Sabab ambo tatiangkan mak, iyo mintak diliek, di ambiak, dimakan, sakapua surang, labiah sa kapua jo dih juo mah.

 Ninik Mamak : Jikok siriah, nan palo mudo siriahkan nan ba tatiangkan ka bakeh ambo, kan iyo siriah ba adiak ba pakaian, adiak rimbun pusako rampak, andak - e panuah pusakonyo bubuang, a bana lah manjadi adat jo pakaiannyo, siriah ba aleh, ba tadah tampan, ba pa ga dengan arai pinang, sacoreang kuniang diatehnyo, salangkoknyo isi didalam, kan itu nan palo mudo tatiangkan ka bakek ambo? Ambo maliek siriah palo mudo, tantu ba adat, ba pakaian, pulo, andaknyo a banalah yang manjadi adat jo pakaiannyo? Iyolah lelo jo korenah, tantu taratik jo nanjilih, walaupun tampan jo paketi nan ambo pintak karilaannyo ka bakeh palo mudo, nan kato siriah palo mudo ka ambo liek, kok senteang lelo jo korenah, kok kurang taratik jo manjilih, walaupun tanpam jo paketi, itu nan ambo mintak karilaanyo ka bakek palo mudo, ka baa ka bakek palo mudo tuh ?

 Palo Mudo : Dek banyak kadok rago, manusia basifat gawa, tantangan rila dengan maaf samo kito pulangan ka urang nan tau, siriah ambo diliek, di ambiak, dimakan sakapua surang mak, sekian bana mak?

 Ninik Mamak : Kini baitu palo mudo, tantang siriah palo mudo nan ba makan, dari nan barek nan karingan, jalan mamutuih kito buek, indak bana dimakan, umpamo dimakan akan tetapi ateh sakato, jo palo mudo, ka baa dek palo mudo tuh ?

 Palo mudo : Ateh sakato diri ambo mak, alah ba makan siriah ambo mak ?

 Ninik Mamak : Alah

 Palo Mudo ; Nan kato alah diliek, diambiak, dimakan, takilan dek hati, tacinto dek pikiran, nak masak jo ma ansu-e, siriah salabiah amak makan nan talatak dalam carano, carano banapun sakali, alah ka jadih ambo ansu-e mak?

 Ninik Mamak : Kini baitu palo mudo, kok itu undiangan palo mudo jo ambo, yo lah basuo bak undang - undang palo mudo kok mah, masak padi rang singkarak, masaknyo batangkai - tangkai , satangkai tak adolah nan mudo, kabek sabalik buhue sentak, laranglah urang ka ma ungkai, tibo nan punyo anakrajo, aratinyo bana,pulang pikiran ka palo mudo, ka satu ka di asah, ka duo ka diangsue, ka tigo latakkan sajo disitu.

 Palo Mudo : Kok pulang pikiran ka bakeh ambo, yo ambo ansue dulu mak.

 Ninik Mamak : Insya Allah

 Palo Mudo : Kini baitu mak, ba a dek tadi, takana dek hati, takalam juo dek pikiran, ndak ma asak jo ma ansue, siriah salabiah amak makan, nan talatak dalam carano, carano bana pun sakali, dek amak alah basabaan dek ambo alah pulo baansue, baa kini lai nyo mak, sapanjang pasa biasoe, ba laie madang pulu, malantiang padang tampuak, bakato madang bana, siriah kok mak kan iyo ba awa ba akie, ba mulai ba kasudahaan, diawanyo siriah ambo siriahkan, di akie nyo masak nan ambo tanyokan, alah banamo masak mamak, makan siriah ateh banamo sakapua surang itu pulo yang manjadi tanyo dek ambo mak, sekian bana dulu mak?

 Ninik Mamak : Kini baitu palo mudo, nan manjdi tanyo dek palo mudo tadi, tantang ka pado masak ka makan siriah, ba a andek e jo kok dek ambo, gayuang tasambuik capek, kato tajawab lakeh, masak makan siriah, capek ka ta pambai ka batigo, yo baiyo kami dahulu, yo mananti palo mudo sabanta.

 Palo Mudo : Insya Allah

*NINIK MAMAK MAMPAIYOKAN KA BAKEK BAGINDO *

 Ninik Mamak : Kini baitu palo mudo, tantang masak makan siriah, baa jo kok dek ambo baru tadi, bana di laluan , janji di pintak jo palo mudo, dek palo mudo alah mananti, dek ambo alah ba paiyokan, baa tantang paiyo ambo nan tun, misa gayuang ka manyambuik, kato ka nan manjawab, pan baie masak makan siriah pun sakali, ka bakeh palo mudo, iyolah ambo bantuak - e , ka baa dek palo mudo tu ?

 Palo Mudo : sampai mak, ? dek ambo dengan isya Allah se mak.





 Ninik Mamak : Kini baitu palo mudo, nan manjdi tanyo dek palo mudo tadi, tantang kapado ka masak siriah, baa masak makan siriah nang ko, manuruik pituah tuo, kan ado tigo pakaro:
1. masak ka ba ka pu-e
2. masak ka ba kunyah
3. masak ka mupakaik
Kini dapek kato sabuletan dek kami, yo masak jo mupakaik
dek kami, ka ba a dek palo mudo ?

 Palo Mudo : Dek ambo asa masak ka ba kapu - e jo bakunyah, lai ambo nanti, apolagi masak jo mupakaik, alah ba namo masak siriah ambo mak ?

 Ninik Mamak : Ateh sakato palo mudo, alah.

 Palo Mudo : Nan manjadi tanyo dek ambo taditantang masak makan siriah, dek amak pambai hati ambo alah sanang pulo, baa kini mak, sapanjang pasar biaso - e , asa lai adih, lai ba dalie, kok kunum kato, tak ba misa, di misakan kapado aie, kok ilie di agiah ba muaro, mudiak di agiah bahulu, supayo a tu ? laweh nak batapi, buntak nak basuduik, bajak nak baranti, bakato nak basudah, tantang undiangan siriah, sakali kini ko mak, kito agiah baranti ka baa dek amak tu?

 Ninik Mamak : Ruponya dek palo mudo kok mah, tali tantang ka ba putuih, bangkalai takambang ka baguluang, cabiak saketek ba ja rumek, batambah tinggi harago - e , ba jo kok di ambo andek - e capek taliek talenggangi, capek takuruang takampuangi, kok hujan ndak mananti taduah, malam ndak mananti siang, capek ta timbuan ka palo mudo, nak barahaik tantangan undiangan siriah, baa kini alah takanan bana dek palo mudo, iyolah basuo undang – undang palo mudo kok mah, anak bubuik di tapi rimbo, nan basarang di pambatang, layang manyembuah buiah, pucuak di tuntuik ulam tabu, sumua di kali aie nan datang, akar dicari rotan nan buliah.













* RUNDINGAN MAMINTAK HARI NAN SA HARI MALAM NAN SAMALAM UNTUK PERESMIAN ANAK KAMANAKAN KITO *

 Palo Mudo : Kini baitu mak, nan kato kitolah agiah barahait pihak kepado undiangan siriah, baa jo kok ambo laweh lah batapi, buntak lah basuduik, kok ili – e lah baah muaro, kok mudiak alah bahulu, baa ruponyo dek ambo kini mak iyo jo bak kato mamak kok mah, adat bijo ndak sakali tumbuah, adat mangauik ndak sakali kameh, pangana ndak sakali timbua, dek tadi siriah nan baru ambo siriahkan baa ruponyo kini undiangan pulo nak mambaco dibaliak undiangan siriah, tapi sungguahpun ka mamak surang sifat - e ka niniak mamak nan saparadok alah kajadi ambo baco.

 Ninik Mamak : Kini baitu palo mudo, nan kato kami, lai baduo batigo pulo, ba io lo kami dahulu mananti Palo mudo sabanta, ka baa tu ?

 Palo Mudo : Dek ambo mak Insya Allah


* NINIK MAMAK MAMULANGKAN KA PALO MUDO *

 Ninik Mamak : Kini baitu Palo Mudo, Kok lai bana takana itu insya Allah Bacolah kami dangar .

 Palo Mudo : Tu baa yo ambo baco ?

 Ninik Mamak : Insya Allah, Bacolah ?
 Palo Mudo : Tapi sungguahpun amak surang nan ambo imbau, sifatnyo sagalo ninik mamak saparadok, a banalah rundingan nan ka ambo baco mak, tumbuah sacaro nan bak nangko , yo basuo undang - undang urang darek dahulu , kato basitinah kaduyan kato basipek kato dahulu, rabah rumah panau - e tingga, lapak panau - e parumahan tantu ka ado juo, kato - kato yang kita danga sari manih, baju nak urang sunu - e di jahik lambek disudahkan, nan kok manih nambek kok dilulu - e , kok paik usah di luak kan, sepanjang pasa biaso- e usang – usang di pabaru, lapuak - lapuak di apikan, patah tumbuah hilang baganti tantu kato dapek disuruitkan kapangka nyo mak, abana lah pangka nyo mak? Nan kato lah lahi-e ditangah rumah ko, anak dek urang sumando kamanakan dek mamak, kok anak ko mak kan duo pulo bahagi -e, ka satu anak laki - laki , kaduo anank parampuan. Di het ong kapado anak perempuan ndak ubah do nasakah cincin di jari manih pamenan mato patang pagi, siang di patingkek malam di pakalang, kok di etong kapado umu-e dari sabulan ka duo bulan lah batahun pulo diateh-e, sahinggo lah tamat pulo sakolah jo mangaji, kiro ba umu-e 19 tahun kan lah barek baban kito mak, kok barek indak tapiku-e surang, kok ingan ndak tajinjiang surang, basamo mak tabaok mak, di tiliek lahi-e jo batin dipandang anak lah gadang asa lai adih lai badali-e kok konon kato ndak bamisa , di misakan ibarat kacang di ketek diagiah manyambo lah gadang patuik di agiah junjungan , baa jo kok dek kami silang sapangka nan sapokok lah dilayangkan pandangan jauh lah ditukiakkan pandangan dakek baa kini yo lah ta tapek kapado urang kito juo, namonyo ............ baa kok si .......... , kamanakan kito namonyo si ............, baa jo kok kami lah di lapek usua jo pareso ka bakeh mamak yang pihak laki - laki kok tagamang alah di jawab hanyuik alah di sonsong, kok tagok alah bakabek- an alah batunangan namonyo kamanakan kito kaduo balah pihak “ sikumbang jo Piliang”, baa pintak kami kabakek ninik mamak nan saparadok kini langkah nan talanju-e tagok mangabekkan antaro kamanakan mamak di jawa sakian dulu mak.

 Ninik Mamak : Iyo sabananyo palo mudo, alah baban niniak mamak nan palo mudo jalanan tu, jo kami ninik mamak nan ado kini lah kami restui

 Palo Mudo : Kini baitu mak , nan kato alah direstui dek ninik mamak karajo kami tu baa nyo lai dek kami ateh banamo silang nan bapangka karajo nan bajunjuang sarato jo urang samando kok bisiak nak mandarehkan, batin nak mandohaikan, nan bak suluah matahari, nak bagalanggang mato rang banyak iyo nak mamintak hari nan sahari malam nan samalam untuk peresmiak pesta anak kamanakan kito kok karandak buliah pintak balaku, sakian dulu mak.

 Ninik mamak : dek kami ninik mamak, palo mudo asa indak balantuang harinyo dima alah di bincang - bincang dek palo mudo jo silang sapangka kamukokanlah dek ninik mamak.

 Palo Mudo : Hari ........ tgl ............... Bulan ............... tahun ...............

 Ninik mamak : Insya Allah

 Palo Mudo : Nan kato kahandak lah buliah pintak lah balaku baa jo kok ambo ateh namo silang nan bapangka kok tantang ila jo maaf samo kito pulangkan ka urang nan tau, undiangan ambo tutup dengan Assalamu a’laikum W.W


*MANJAPUIK MARA PULAI*

Syarat manjapuik marapulai :
1. 3 orang
2. siriah carano
3. Tungkek tan yang disepakati oleh Ninik mamak 2 belah pihak


* CARO BARUNDIANG MANJAPUIK MARA PULAI KEPADO
MAMAK MARAPULAI *

“ PANGKA NYO DI AWA TADI “

* RUNDIANGAN CARO MANJAPUIK MARAPULAI KEPADO
NINIK MAMAK *

“ BUKA UNDIANGAN SIRIAH “

3 Orang : Jo kok kami nan batigo ko mak pai karano suruah baranti karano tagah, disuruahnyo dek mamak datuak caluang kamari, malamnyo dek malam hari-e kini, pi manapek -i buek jo janjian, janji arek karang badagok, pi manjapuik marapulai jo urang mudo ma antakan kami paringankan dima hari katiko nyo karumah nak daro mulah kito di ma ukue jo jangkanyo mananti ambo, sapanjang karang buatan mamak kaduo balah pihak ko nyo mak yang talatak dihadapan sakian mak.


* CARO MEMBERIKAN PAMBAWAAN DR BAKO KA ANAK PESTA PERKAWINAN *

 Bako : Ajo, tp sungguahpun .............

 Pangka : Insya Allah

 Bako : A banalah undiangan ambo baco nan kato alah tajadi dirumah anak kami ko, pesta atau baralek manuruik sepanjang pasa nan biasokan dilapeh undangan kian kamari , nan tasabuik simpang balahan kuduang karetan sarato andan pasa mandan baa jo kok kami ateh namo bako datang dari mudiak mah lah kini kami kamari, baa undiangan ajo kok bajalan babuah batih malenggang babuah tangan ndak disabuik bana tu mah di bao saikua apak bilalang sarato yang lain – lain perlengkapannyo dari bako, andek-e dek ajo ateh namo silang nan bapangka karajo nan bajunjuang sarato urang samando batarimo handak-e hati suci muluik manih muko janiah sakian dari kami dulu jo.

 Pangka : Paiyokan dan pulangkan kabakeh bako

 Pangka : Nan kato ambo ka mamulangkan buah parundiangan sutan, andek-e ba adok bak tari-e bak datang bak nanti-e aratinyo bana sa edaran bumi jo langik sa jugalo kadam jo kapua aratinyo bana tai mak kato ajo tadi tau lai kato ajo cako singkek bauleh lamah batau-e , lamah batukuak baa raso-e dek badan diri ambo kini nan bek nan singkek nan tauleh nan kok panjang kok takareh nan bek kurang ka batukuak, kok nan jinak ta usak-i ka baa dek ajo tu ?
 Bako : Insya Allah, dek ambo 1,2,3 jo kuhu-e sutan bapambari alah kajadi dek ambo

 Pangka : A bana undiangan ajo ka bapulangkan nan kato lah baraleh kami disiko dek ajo ateh namo bako, jauah alah di jalang ampi-e alah dituruik, sakarang ko ma lah tibo disiko kok auih alah bahagiah aie kok litak alah bahiah nasi baa kini ko lai, dek ajo bajalan babuah batih malenggang babuah tangan baa kato jo tadi andek-e silang nan bapangka batarimu hati suci muko nan janiah kan baitu kato ajo cako, dek kami jo ndak mamandang itu bana do, poko-e alah badiri apak mandehnyo disiko alah sanang hati kami jo.

 Bako : Kini baitu sutang, nan kato mukasuik lah sampai di amal lah pacah, baa ruponyo dek kami ateh namo bako kok duduak nak mambukak selo tagak nak marenjang langkah nak pai katampek masiang - masiang, andek-e dek sila sapangka balapeh hati nan suci muluik manih muko nan janiah sakian dulu sutan.

 Pangka : Kato ajo cako nan kato dimaksuk alah sampai, baa ruponyo dek kami ateh namo bako kok duduak nak mambukak selo tagak nak marenjang langkah nak pai katampek masiang – masiang, kini iyo lah basuo undang – undang ajo, si kucu-e di lauik lapeh baranak makanan ikan, gulang - gulang di kurau taji, kok muju-e kami malapeh jo, nan bak ayam pulang ka pauitan, salamai ajo pulang pai ka baa ajo tu?

 Bako : Ba-a lai sutan, kok salah jangga kami talantuang kanaik, ta singguang katurun ndak dimasuik disangajo manusia basifat gawai rundingan ambo tutup dengan Assalam mualaikum W.W